提早離場的對與錯 批評LBJ就是帶風向
昨日幾乎成個籃球界，都討論LBJ的提早離場。朋友話，每次批評LBJ，就會好多人出來反擊，「帶風向」同「抺黑」，係聽到最多的形容。
其實我經歷過好多唔同的批評，通常都由得佢，例如2016年寫勇士咖哩仔的問題，就被人話我係LBJ迷（難以想像呢），之後又話我盲撐Russell Westbrook、死忠勇迷、貴古賤今等等，不一而足。有次同朋友提到2013年馬刺贏勇士，寫過一篇講咖哩仔會好勁，仲俾人笑戇居。又有好多人以為我只係睇馬刺，就算寫愛隊，只要維護一下LA同DDR，一樣會俾人鬧。
上一個post，有人話，呢個八婆專帶風向，從來唔分析場波，而其實每日都寫幾千字去做呢樣野。
我覺得近年有個趨勢，就係想去理性討論，越來越難。每次批評一個球員，都會用好多不同的比賽片段或者數據去寫，但好少有反駁的人，認真咁去搵理據去反駁，反而一句抹黑就算，呢樣先係最可笑也最可悲的事。
所以朋友問我，是否要回應，我話，在網路世界，根本不可能，亦冇咁多時間。亦有朋友勸我，有啲擺明假account，亂咁留言，點解唔ban？可能我比較珍惜自由的香港，今時今日連着黑衫落維園都唔俾，更加唔想隨便做判官。除非太過份，你留言鬧我，我又唔會少塊肉嘅。
反而多謝朋友同讀者為我不值，咪當修行，唸幾次莫生氣就冇嘢啦。講嬲同唔開心，每日的新聞更加不堪啦。
今日的比賽，我寫了LBJ第二節不回防，以及第四節提早離場的過程，我睇咗留言，以及其他不同的論壇，外國討論區等，都係鬧的多，維護的少，最大的對比，係其實更應該返入更衣室接受治療的CP3，返出來陪住隊友，第四節都如此，仲趁暫停時鼓勵隊友。當時太陽已經贏梗，佢點解要咁做？因為一個領袖，就係有責任去同甘共苦。
睇到留言，我驚訝於好多人的價值觀扭曲，亦歎球迷的變得太快，只係慶幸尚有不少較理智的球迷，會真係抽時間睇波，然後大家一齊討論。
— — — — — — — — — — — — — — — — — — — — — — — -
賣下廣告，有興趣睇長文分析，傾下波的朋友，歡迎訂閱小弟Patreon。
