未開波先熱身 「巴拿馬總統同我都算有啲交情架。」

《賭神》未必係香港最受歡迎嘅電影，不過講金句嘅頻密程度，就肯定係港產片頭十位；直到今日，巴拿馬總統、液晶體顯影眼鏡、瑞士銀行本票、後生仔始終都係後生仔，呢五百鋪先加上去，仍然係大家去到某個特定場合，就會衝口而出嘅歷久不衰金句。

我試過同朋友講，話呢套戲全部對白都識背，入面金句多到嚇親人，佢就話口講無憑，所以我就整理好晒；如果漏左一句半句，各位高明記住幫我補番。以賭被嚟計，《賭聖》都遠遠追唔上，睇怕真係要出《賭俠大戰拉斯維加斯》先可以鬥一鬥。

今晚11點就由「歐洲紅魔」比利時鬥巴拿馬，到時肯定大把人又會「賭魔」陳金成上身，大大聲話「巴拿馬總統同我都算有啲交情架。」如果比利時不幸又好似一眾強隊咁失分，到時就唔知邊個會講呢句金句了。

講開巴拿馬總統，最好笑係賭神上畫時正正係1989年，當年Guillermo David Endara Galimany剛上任，可能有香港人手痕，就上維基改左「吉列爾莫·恩達拉」嘅簡介，加咗呢段。

「恩達拉與新加坡賭王陳金城份屬好友，陳金城當年在公海的船上開槍殺人，因船的註冊地為巴拿馬，陳金城原想找恩達拉出面搞平，但發現船並沒駛出公海，仍在香港水域，結果被皇家香港警察拘捕，誤殺罪成，判監五年。」

痴線，邊個做嘅，快啲出嚟自首！😂😂😂係咪癲㗎！

以下金句，排名分先後，全屬個人喜好。

「後生仔始終係後生仔。」（出過兩次，到今日仍然係不少人的金句）

「你戴緊個副液晶體顯影眼鏡，係兩年前美國的過時產品，而我呢副隱形液晶體顯影眼鏡，係上個月西德最新產品，價值十一萬美金！」（一定要記得晒全部，中間有停頓位，扮埋攞副con出嚟先得。今日西德都冇埋，但德國高科技已經深入港人心中）

「巴拿馬總統同我都算有啲交情架！」（直到今日，每次寫波有巴拿馬出場，體育組同事都自自然然就會講呢一句）

「冇用架，你試下行出窗口望下，睇下見唔見到大嶼山。」（呢下真係笑到斷氣，最正係連住咁爆金句不停）

「朋友，你返印度食蕉啦！」（種族歧視，今日一定唔出得）

「仲有，我摸戒指呢下小動作，係我故意係最近五百鋪加上去，來裝你呢個老狐狸！」（唔識呢句唔好話睇個賭神）

「點解高進可以做賭神，我高義就成世做茄喱菲。」（可惜，入面好多經典角色都過左身，高義，大傻，陳立品……）

「我呢度有張瑞士樂斯銀行本票，價值三千萬美金。」（從此，瑞士銀行本票就成為左所有賭局的最後籌碼）

「南哥，我知你唔拋得，不過你輸得。」（發哥型到極點，搞到楊澤霖完全變左嘍囉）

「我冇所謂呀，聚賭最多罰三千。你殺人，最少坐三十年啦。」（賭神有時講野又成個古惑仔咁）

「我睇怕你餐壽酒都要係赤柱擺啦啩。唔好諗住畀帖我呀，我唔得閒嚟飲。」（一口氣金句不絕，又係要背晒先係真fans）

「咁啦，我用無線電話幫你買咪得囉。喂，123，7689，密碼456，99。第三場，七號，一萬銀win，一萬銀披士，唔該唔該。」（當年電話都難搵，所以王祖賢報唔到警幾乎出事，所以大傻有個水壺真係好霸氣，亦已成為集體回憶。）

「剪你㗎！」（王晶客串時鍾酒店爆房男女一角，當年真係覺得佢好有才華）

「執槍呀！高進！」（當年唔知五哥係咩人，後來知道才覺得同個角色係絕配）

「契弟，你仆街啦！」（高義喺呢套戲真係慘過乜）

「大佬，大你老母咩，仲唔叫白車。」（吳盂達都係做豬油仔正Ｄ）